Voluntariado

Remata o curso e pronto entregaremos os diplomas ás voluntarias e voluntarios de Biblioteca. 15 horas de traballo ben aproveitadas.

É un pracer contar con todos eles/as. Aportan, axudan... dun tempo a esta parte o seu labor volveuse imprescindible, é xusto recoñecelo. Cun profesorado con tantas horas de clase, as horas asignadas a Biblioteca e a outros moitos plans e clubes son moi escasas. Sen o grupo, non poderiamos ter feito moitas das actividades, exposicións, e mesmo abrir nos recreos en condicións. Grazas, pois, polo voso labor.

 

Club de lectura

Derradeira sesión do curso do Club de Lectura.

Como vén sendo habitual na xuntanza do 3º trimestre, a piques de sumerxirnos no verán, celebrámola debaixo do ombú. Non hai nada como a sombra dunha árbore. Esta, que ademais é senlleira, apórtanos un toque de maxestuosidade importante.

Para este trimestre eliximos, novamente, un tema. Se no primeiro foi a literatura gótica, e no segundo a Segunda Guerra Mundial,  neste terceiro decantámonos polo misterio.

As novelas escollidas foron: "Cicuta para dous", de Rocío Leira, e "Un cadáver en la biblioteca", de Ágatha Christie. Comentámolas, intercambiamos pareceres. As profes concluímos que Ágatha Christie nunca falla, tendo en conta que algunha de nós lera varias das súas novelas na adolescencia. Gabi e Cris dixéronos que o da escritora inglesa é un bo libro para ler en inglés. Anotado queda, algunhas ímolo intentar.

As lecturas parecéronos propicias para xogar ao cluedo. Repasamos as normas e comezamos, pero entre a calor e o final de curso... enseguida cambiamos a partida por unhas carreiras en busca da ameixeira e os seus prezados froitos. Quédanos tempo, no vindeiro outono, de retomar o xogo.

 

Unha visita moi especial

O luns, 8 de xuño, recibimos con ilusión ao alumnado de 6º de primaria do CEP Dr Fleming. Cheos de curiosidade, visitaron o instituto.

Unha das paradas foi na nosa Biblioteca.  Cada un dos 96 que nos visitaron confeccionou unha folla desta recreación do ombú co título do libro que lle gustaría que estivese na nosa biblioteca. Unha verdadeira árbore de lecturas!

 

Letras Galegas 2026

 Que a Begoña Caamaño se lle dedique o Día das Letras Galegas, parécenos unha decisión marabillosa que festexamos.

No IES do Castro, Morgana en Esmelle constitúe unha das lecturas que, ano tras ano, escolle gran parte do alumnado de 1º de Bacharelato.

Circe e o pracer do azul é unha das lecturas de verán que o profesorado elixe continuamente. Gústanos esta revisión do mito de Penélope e concordamos con Xoana Torres: eu tamén navegar.

Aínda en proceso, porque o traballo leva tempo, ofrecemos aquí unha mostra da pequena exposición elaborada por alumnado na materia de galego, e as voluntarias de biblioteca da ESO, que sempre están dispostas a botar unha man.  

 

 

Club de Lectura

 A obra de Eva Mejuto, "Memoria do silencio", que limos no Club de Lectura na segunda avaliación, permitiunos coñecer a historia das irmáns Touza: Lola, Amparo e Xulia axudaron a centos de persoas a escapar da persecución nazi. Dábanlles acubillo, comida, e guiábanos a través da fronteira con Portugal. Teceron unha rede de axuda na vila, e gardaron o segredo da axuda que prestaron ata o falecemento de Lola, a maior das irmáns.

O martes 12 de maio tivemos a oportunidade de facer un roteiro literario por Ribadavia, grazas a Alexandra Touza, a través da súa empresa "Ponle cara al turismo". Amparo e Xulia, encarnadas por unhas estupendísimas actrices, guiáronos pola vila e reveláronnos moitos detalles da súa fazaña.

Unha visita moi interesante, que gozamos a pesar da choiva.

             

             

 

Día do Libro

Durante unha semana, o alumnado de 1º e 2º de ESO baixou á Biblioteca, por quendas, para manter unha cita a cegas cun libro. 

O equipo de biblioteca, coa axuda de alumnado de distingos cursos, preparou esta actividade. Non foi pouca cousa: tivéronse que envolver 240 libros e buscar as verbas máis inspiradoras posibles para escribir por fóra de cada paquete, de xeito tal que lograsen convencer polo menos a un dos alumnos/as para levalos, en préstamo, á casa.

Pedímoslles, tamén, unha recomendación a cada un/unha deles. Unha actividade que gozaron e que repetiremos.

 

 

 

Día Mundial da Poesía

 O 21 de marzo é o Día Mundial da Poesía.

No IES do Castro estendemos a celebración a practicamente o curso enteiro, coa nosa actividade "Os luns, poesía" na que cada luns publicamos no instituto en papel, e tamén nas redes sociais, un poema escollido por calquera membro da comunidade educativa.

Pero ademais, dende hai varios cursos, gústanos contar coa presenza dalgún poeta.

En 2024 contamos con Masha e o seu "Dakota", que recitou para alumnado de varios cursos.

En 2025, María Lado recitou para o alumnado de 1º de ESO varios dos seus poemas.

En 2026, gozamos coa presenza de Samuel Merino. 

Samuel recitou para nós poemas do seu último poemario, "Manual de camuflaxe", que foi merecedor do XIII premio de poesía Manuel Lueiro Rey, do Concello de Fornelos de Montes, e tamén poemas de "Claustro, corda, comensal", poemario anterior.

Samuel vén de ser galardoado, ademais, co VII premio Nacional de Poesía Viva.

Foi un verdadeiro pracer escoitalo. Recitou, xogou cos poemas, envolveunos neles, contounos tanto... Un agasallo de sesión, na que o alumnado quedou prendido dende a primeira verba. 

Non podemos máis que estar agradecidos. 

 

Club de Lectura

O pasado mércores 18 de marzo celebramos o segundo encontro do club de lectura deste curso, centrado nesta ocasión na temática da Segunda Guerra Mundial.

 As obras escollidas foron a novela gráfica Maus, de Art Spiegelman, e Memoria do Silencio, de Eva Mejuto. Dúas propostas diferentes pero complementarias: por unha banda, Maus achéganos unha visión impactante e simbólica do Holocausto a través da banda deseñada; pola outra, a obra de Mejuto pon o foco na memoria histórica dende unha perspectiva máis próxima e emocional.

A recepción por parte do alumnado foi moi positiva, xerando reflexións e debates moi interesantes. Destacamos a importancia destas lecturas hoxe en día, non só para comprender o pasado, senón tamén para interpretar o presente e formar unha conciencia crítica nas novas xeracións.

Para rematar, organizamos unha busca do tesouro pola biblioteca, convidando á nosa familia lectora a descubrir títulos de distintos xéneros —banda deseñada, historia, narrativa e mesmo cine— relacionados coa Segunda Guerra Mundial, convertendo a sesión nun pequeno xogo compartido entre libros, pistas e moitas ganas de seguir lendo. 

23 de febreiro, Día de Rosalía

Rosalía, fonte inagotable de inspiración.

Pensamos en Rosalía, lemos a Rosalía, e énchesenos a cabeza de ideas luminosas. Escoller, so podemos escoller unha, topamos co límite do tempo. 

Aquí unhas fotos do taller de flores e caligramas sobre unha das nosas poetas máis universais.

                                         dfs 

                     

           

 

2025: Ano Castelao

O ano 2025 foi declardo Ano Castelao, pola celebración do 75 aniversario do seu pasamento.

O alumnado de 4º de ESO seleccionou varios dos seus textos, que o grupo de Debuxo Artístico, de 2º de Bacharelato, ilustrou con tinta.

O resultado encantounos, e loce no vestíbulo do instituto.

 

         

Club de Lectura: visita de Manuel Núñez Singala

Non puidemos comezar mellor o ano no Club de Lectura: o pasado 12 de xaneiro, luns, acudiu ao instituto Manuel Núñez Singala e, despois dunha sesión de sociolingüística co alumnado de 2º de Bacharelato, mantivo un encontro co Club de Lectura e cun cuarto de ESO.

Puidemos falar e preguntarlle sobre "Atranco no Banco", que leramos o curso pasado no Club.

O alumnado tivo tantas preguntas que ninguén de nós se moveu cando tocou o timbre para volver a casa. Preguntas sobre o proceso da escritura, sobre o momento de empezar a escribir, sobre o traballo e a inspiración... E moitas risas recordando as torpezas de Rafael e Lois, e o xogo cos oficios e nomes case omnipresente na obra de teatro.

 

 

Bo Nadal

En vésperas do Nadal, compartimos con vós a árbore deste final de 2025.

 

Está feita cunhas postais moi especiais: confeccionadas e escritas por alumnado de ESO, os seus destinatarios son personaxes de historias que lles deixasen pegada, que, dalgunha maneira, lles conmovesen.

Pronto serán enviadas: Greg, Fortunata, Jacinta, Lucanor, Yoichi Isagi, Lupin, Natalia, Moni, Astérix, Richi Tozier... sodes moi afortunados. Mirade os buzóns dos vosos fogares!

 

Tamén queremos amosarvos o traballo do voluntariado de Biblioteca, que se afanou en recordarnos a estación que chega con ilustracións, nas ventás, do Sereo e de edificios senlleiros da nosa cidade.

 

Ás familias todas, diversas e marabillosas: desexámosvos feliz descanso e Bo Nadal.